'കേരള സര്‍വ്വകലാശാല യൂണിയന്‍ യുവജനോത്സവത്തിന് ഇന്ന് അമ്പലപ്പുഴയിൽ തിരിതെളിയും.
അമ്പലപ്പുഴ :കേരള സര്‍വ്വകലാശാല യുവജനോത്സവത്തിന് ഇന്ന് അമ്പലപ്പുഴയിൽ തിരിതെളിയും. ആലപ്പുഴ ജില്ലയിലേക്ക് എട്ട് വർഷങ്ങൾക്ക് ശേഷമാണ് യുവജനോത്സവം എത്തുന്നത്.കുഞ്ചൻ നമ്പ്യാരുടെയും തകഴിയുടെയും സാഹിത്യപഞ്ചാനനന്റേയുമെല്ലാം കർമ്മഭൂമിയും അമ്പലപ്പുഴയുടെ ചരിത്രവും സംസ്ക്കാരവും ഇഴ ചേർന്ന് സമ്പന്നമാക്കുന്ന മണ്ണിലാണ് ഇക്കുറി യുവജനോത്സവം സംഘടിപ്പിക്കുന്നത്.
ഏകത്വ'വേർതിരിവുകളുടെ കാലത്ത് ഒരുമയുടെ കല'എന്ന പേരാണ് യുവജനോത്സവത്തിന് നല്‍കിയിട്ടുള്ളത്. ജാതിയുടെയും മതത്തിന്റെയും വർണ്ണത്തിന്റെയും ലിംഗതിന്റെയും ഭാഷയുടെയും ദേശത്തിന്റെയും പേരിൽ വിവേചനങ്ങളും വേർതിരിവുകളും അക്രമവും നടക്കുന്ന കാലത്ത് മേൽപ്പറഞ്ഞ വേർതിരിവുകളേതുമില്ലാതെ നാമെല്ലാം മനുഷ്യരാണെന്നും 'നാനാത്വത്തിൽ ഏകത്വം' ആണ് ഈ രാജ്യത്തിന്റെ മുഖമുദ്രയെന്നും ഈ പേരിലൂടെ കേരള സർവ്വകലാശാല യുവജനോത്സവം പ്രഖ്യാപിക്കുന്നു.
ഇന്നു മുതൽ ( മെയ് 5 ) 9 വരെ നടക്കുന്ന യുവജനോത്സവ ത്തിൽ കേരള സര്‍വ്വകലാശാലയില്‍ അഫിലിയേറ്റ് ചെയ്യപ്പെട്ട 250 കലാലയങ്ങളിൽ നിന്നായി
117 ഇനങ്ങളിൽ അയ്യായിരത്തോളം വിദ്യാർത്ഥികൾ മത്സരിക്കും.
എട്ട് വേദികളിലായാണ് മത്സരങ്ങള്‍. അമ്പലപ്പുഴ ഗവ.കോളേജാണ് പ്രധാന വേദി ..സാംസ്കാരിക രംഗത്തെ പ്രമുഖ വ്യക്തിത്വങ്ങളുടെ പേരുകളാണ് വേദികള്‍ക്ക് നല്‍കിയിട്ടുള്ളത്.വേദി 1 - വയലാര്‍ നഗര്‍- അമ്പലപ്പുഴ ഗവ.കോളേജ്,വേദി 2- കുമാരനാശാന്‍ നഗര്‍ - അമ്പലപ്പുഴ മോഡല്‍ ഗവ.എച്ച്.എസ്.എസ് സ്റ്റേജ്,വേദി 3 -തകഴി നഗര്‍- അമ്പലപ്പുഴ മോഡല്‍ ഗവ.എച്ച്.എസ്.എസ് ഓഡിറ്റോറിയം, വേദി 4 - കുഞ്ചന്‍ നമ്പ്യാര്‍ നഗര്‍ - അമ്പലപ്പുഴ പി.എന്‍ പണിക്കര്‍ മെമ്മോറിയല്‍ ഗവ.എല്‍.പി സ്കൂള്‍ ആഡിറ്റോറിയം,വേദി 5 - നെടുമുടി വേണു നഗര്‍ - അമ്പലപ്പുഴ പി.കെ മെമ്മോറിയല്‍ ലൈബ്രറി ഹാള്‍ ,വേദി 6-കാവാലം നാരായണപ്പണിക്കര്‍ നഗര്‍ -സെമിനാര്‍ ഹാള്‍ ഗവ.കോളേജ് അമ്പലപ്പുഴ,വേദി 7- ഇന്നസെന്റ് നഗര്‍ - അമ്പലപ്പുഴ കെ.കെ കുഞ്ചുപിള്ള മെമ്മോറിയല്‍ ഹയര്‍ സെക്കണ്ടറി സ്കൂള്‍ ആഡിറ്റോറിയം, വേദി 8 - മാമുക്കോയ നഗര്‍ കെ.കെ കുഞ്ചുപിള്ള മെമ്മോറിയല്‍ ഹയര്‍ സെക്കണ്ടറി സ്കൂള്‍ ഹാൾ അമ്പലപ്പുഴ എന്നിവയാണ് വേദികൾ. ഇന്ന്
മെയ് 5 ന് കുഞ്ചൻദിനത്തിൽ വൈകിട്ട് 3 മണിയ്ക്ക് സാംസ്കാരിക ഘോഷയാത്രയോടുകൂടി യുവജനോത്സവത്തിന് തുടക്കമാവും. ഘോഷയാത്ര ദേശീയ പാതയിൽ അമ്പലപ്പുഴ കെ.കെ. കുഞ്ചുപിള്ള മെമ്മോറിയൽ സ്കൂളിൽ നിന്ന് ആരംഭിക്കും. ഫിഷറീസ് - സാംസ്കാരിക - യുവജനകാര്യ വകുപ്പ് മന്ത്രി സജി ചെറിയാൻ ഉദ്ഘാടനം ചെയ്യും. കലാ-സാംസ്കാരിക- സാമൂഹിക രംഗത്തെ ഒട്ടേറെ പ്രമുഖ വ്യക്തികൾ പങ്കെടുത്ത് സംസാരിയ്ക്കും. തുടർന്ന് വൈകുന്നേരം
6 മണിക്ക് തിരുവാതിര, മോഹിനിയാട്ടം എന്നീ ഇനങ്ങളോടെ മത്സരങ്ങൾക്ക് തുടക്കമാകും.
യുവജനോത്സവത്തിന്റെ ഒരുക്കങ്ങള്‍ പൂര്‍ത്തിയായതായി സംഘാടകർ അറിയിച്ചു. യുവജനോത്സവത്തിന്റെ ഏകോപനത്തിനായി 16 സബ്കമ്മറ്റികള്‍ രൂപീകരിച്ച് പ്രവർത്തി യ്ക്കുന്നു.
എച്ച്. സലാം MLA ചെയർമാനും,എ. എ. അക്ഷയ് ജനറൽ കൺവീനറുമായ സ്വാഗതസംഘത്തിന്റെയും കേരള സര്‍വ്വകലാശാല യൂണിയന്‍ ചെയർമാൻ A. വിഷ്ണു, ജനറൽ സെക്രട്ടറി എം. നസീം എന്നിവരുടെയും നേതൃത്വത്തിലാണ് യുവജനോത്സവം സംഘടിപ്പിക്കുന്നത്.
