കെ- റെയിൽ സർവ്വെ: ഗുരുതരമായ മനുഷ്യാവകാശ ലംഘനം: കെ.സുരേന്ദ്രൻ

പൊലീസിനെ ഉപയോഗിച്ച് പാവങ്ങളെ കുടിയൊഴിപ്പിക്കാനുള്ള നീക്കം ബിജെപി ചെറുത്ത് തോൽപ്പിക്കും-കെ സുരേന്ദ്രൻ

കോഴിക്കോട്: കെ- റെയിൽ സർവ്വെയുടെ പേരിൽ കേരളത്തിൽ നടക്കുന്നത് ഗുരുതരമായ മനുഷ്യാവകാശ ലംഘനമാണെന്ന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. കഴിഞ്ഞ ദിവസം സർവ്വെയുടെ പേരിൽ പൊലീസ് അതിക്രമം നടന്ന കോഴിക്കോട് കല്ലായിൽ സന്ദർശനം നടത്തുകയായിരുന്നു അദ്ദേഹം. സ്ത്രീകളെ കയ്യേറ്റം ചെയ്യാൻ പുരുഷൻമാരായ പൊലീസുകാർക്ക് ആരാണ് അധികാരം നൽകിയതെന്ന് മനസിലാകുന്നില്ല. കൊച്ചുകുട്ടികളെ സമരരംഗത്ത് ഇറക്കിയെന്ന പേരിൽ സ്ഥലം നഷ്ടപ്പെടുന്നവർക്കെതിരെ പൊലീസ് കേസെടുത്തിരിക്കുകയാണ്. യഥാർത്ഥത്തിൽ മനുഷ്യാവകാശ കമ്മീഷനും വനിതാ കമ്മീഷനും പൊലീസിനെതിരെയാണ് കേസെടുക്കേണ്ടത്.

 പൊലീസിനെ ഉപയോഗിച്ച് പാവങ്ങളെ കുടിയൊഴിപ്പിക്കാനുള്ള നീക്കം ബിജെപി ചെറുത്ത് തോൽപ്പിക്കുമെന്നും സുരേന്ദ്രൻ പറഞ്ഞു. സംസ്ഥാന വൈസ് പ്രസിഡൻറ് പി.രഘുനാഥ്, സംസ്ഥാന സെക്രട്ടറി അഡ്വ.പ്രകാശ് ബാബു, ജില്ലാ പ്രസിഡൻ്റ് അഡ്വ.വി.കെ.സജീവൻ, ദേശീയ കൗൺസിൽ അംഗം കെ.പി.ശ്രീശൻ, ഒ.ബി.സി. മോർച്ച സംസ്ഥാന പ്രസിഡൻറ് എൻ.പി.രാധാകൃഷ്ണൻ ,ജില്ലാ ജനറൽ സെക്രട്ടറി ഇ.പ്രശാന്ത് കുമാർ, ജില്ലാ ട്രഷറർ വി.കെ.ജയൻ, മഹിളാ മോർച്ച സംസ്ഥാന ജനറൽ സെക്രട്ടറി നവ്യ ഹരിദാസ്, യുവമോർച്ച ജില്ലാ പ്രസിഡൻ്റ് ടി.രനീഷ് എന്നിവർ സുരേന്ദ്രനൊപ്പമുണ്ടായിരുന്നു.